تقديم عرض فعال (باللهجة المصرية)
مهارتك في تقديم برزنتيشن قوي ومُلفت أصبح ضروري جدا مش لمجرد أنه بيتطلب منك ساعات، ولكن حتى علشان تحصل على شغل في أي مؤسسة دولية كبيرة أو جامعات عالمية، فكتير منهم أصبحوا بيطلبوا منك تقديم برزنتيشن مختصر في ٥-١٠ دقائق في بداية أي أنترفيو عندهم…
الموضوع ده حصل معايا في وظيفة حصلت عليها في جامعة كامبردج ووظيفتين سابقتين والحالية لي في جامعة إمبريال كولدج لندن (وهم من أفضل ١٠ جامعات في العالم)، وكمان في وظائف في مؤسسات في الأمم المتحدة، الحمد لله … الـ١٠ نقاط اللي جايين دول مهمين بشكل عملي في موضوع التقديم في الحالات دي (باختصار جدا وبعيدا عن نصايح البرزنتيشنات المعتادة زي حضّر كويس والثقة والحاجات دي لأنها معروفة وأساسية أكيد).
١- أتعامل مع اللي قدامك على أنهم بشر مش كمبيوتر أو آلات… يعني ماتقعدش تدي المعلومات بشكل جاف كأنك بتسرد أو بتحل مسألة رياضية… أعرض معلوماتك كأنها قصة تجذب أنتباههم … يعني مثلا تقول: “لو قعدنا ندور في كل مكان على كذا وكذا، هنكتشف أن ١-٢-٣”، بدل ما تقول المعلومة وخلاص.
٢- بداية دخلتك هي أهم شئ، أجذب أنتباههم يا إما بسؤال يخليهم يفكروا (وأنت هتجاوبه خلال كلامك)، أو مقولة قوية عن الموضوع، أو قصة قصيرة أو موقف ذات علاقة.
٣- استخدم “تخيّل”، علشان تحطهم هم في الموقف وداخل الموضوع فيحسوا أنهم فعلا المعنيّن بكلامك، قولهم “تخيل نفسك بتعمل ١-٢-٣”… كلنا بننجذب أكتر للكلام طالما حسينا أنه يمسني وأنا جزء من الموضوع مش كلام عام.
٤- لو كان مناسب، استخدم أي أداة تجذب الأنتباه أثناء تقديمك، يعني لو مثلا بتتكلم عن سماعات الأذن، فهات معاك سماعة أذن وتتكلم عنها بصفة الأشارة “دي ممكن تسبب ١-٢-٣، وهكذا” … هيفتكروك لو شافوا حاجة بجانب ما بيسمعوك.
٥- استخدم أرقام: أول ما تكتب رقم أو تقول رقم، عادة الناس بتنجذب أكتر، فخلي فيه أرقام في كلامك وده بيدي صورة ثقة أكتر في معلوماتك.
٦- أفتكر قاعدة ٧/٣٨/٥٥ … لما تكلم حد فـ٥٥٪ من الفكرة اللي هتوصله هتكون من خلال تعبيرات وشك وجسمك، و٣٨٪ من خلال نبرة صوتك وتغيرها، و٧٪ فقط من خلال الكلام نفسه … فماتهملش ٩٣٪ وتهتم فقط بالـ٧٪ الباقيين.
٧- “اسكــــت” شوية… خلي فيه وقفات في كلامك وما تجريش في الكلام، اديهم وقت يتنفسوا ويفكروا في كلامك، خاصة لو سألت انت سؤال مجازى أو قولت معلومة صادمة أو قوية.
٨- خلي الابتسامة هي الـbaseline بتاعك.. المشاعر مُعدية.. لو أنت طبيعتك مبتسم اثناء كلامك، اللي قدامك هيحس انه مبسوط لما تخلص كلامك من غير سبب منطقي، لأن عادة المشاعر مُعدية
٩- أنهي الموضوع قوي زي ما بدأته، أنهيه برسالة قوية أو إفادة عملية، وياسلام لو كانت الإفادة دي تمس الحياة اليومين للي قدامك سواء في حياتهم الشخصية أو العملية.
١٠- بينك وبين نفسك تكون مقتنع أن البرزنتيشن ده مش نهاية العالم، وأن أسوء حاجة ممكن تحصل انك تلغبط أو انهم مايعجبهومش الكلام، فاتكلم بانطباع انك فعلا عايز تفيد اللي قدامك وتوضح وجهة نظرك عامة.
أحمد نجيب
