العلاقات الحقيقية

العلاقات الحقيقية مش لازم نحس فيها إنها واجب أو التزام لازم نؤديه، لكن المفروض تكون مبنية على العطاء اللي بيجي من القلب، العطاء اللي مافيش وراه انتظار لمقابل. لما تقول كلمة حلوة، مش عشان مطلوب منك أو عشان ترضي حد، لكن لأنك بجد بتحب تشوف تأثيرها في قلب الشخص اللي قدامك، تحب تشوف الفرحة اللي بتلمع في عيونه بسببك، وتعرف إنك كنت السبب في لحظة دفء حقيقية.

لما تساعد، ما تكونش بتعمل كده بس عشان حد طلب منك، لكن لأن جواك إحساس حقيقي إنك تحب تكون سبب في نجاح شخص بتحبه، تحب تكون جزء من رحلته، جزء من قوته اللي بترفعه وقت ضعفه. العلاقات مش عملية مقايضة، مش لازم كل حاجة تترد، ولا كل معروف يتحسب، العلاقات عمرها ما كانت “أخذ وعطاء” بمعادلة واضحة، لكنها إحساس إنك موجود في حياة حد، ووجودك ده فرق، وساب أثر، وخلق راحة وطمأنينة.

في العلاقات الحقيقية، ما بتحسبش إنت عملت إيه وخدت إيه في المقابل، لكن بتحس قد إيه اللي بينكم طيب، مريح، صادق. العلاقة الصح هي اللي تسيب فيك أثر جميل، هي اللي تخليك مرتاح ومطمئن، هي اللي ما تحسش فيها إنك بتقاتل عشان تحافظ على وجودك، لكن وجودك فيها طبيعي، بسيط، ومحبوب.

فمفيش حاجة أجمل من إنك تلاقي نفسك في علاقة ما بتحسش فيها إنك مضطر، ما بتحسش إنك بتؤدي واجب، لكن كل حاجة بتعملها طالعة منك بصدق، بحب، وبإحساس حقيقي إنك عايز تدي من غير تفكير في العائد. العلاقة الصح مش محتاجة موازين، مش محتاجة حسابات، محتاجة بس إن كل طرف يكون موجود بروحه وقلبه، مش بجسده بس.

الحب الحقيقي مش إنه يكون فيه “مقابل” لكل حاجة بتعملها، لكنه إنك تكون في علاقة بتعيّشك شعور إنك مش لوحدك، إنك مهم، إنك مرغوب، إنك محبوب بصدق. العلاقة اللي تدي فيها وأنت مرتاح، اللي تقول فيها الكلمة الطيبة لأنك حاسس بيها بجد، اللي تساعد فيها لأنك شايف إن وجودك فارق، دي العلاقة اللي تستحق تكون فيها.

أما العلاقات اللي دايمًا فيها ضغط، فيها شعور بالالتزام بدل الحب، فيها تفكير مستمر في “إحنا فين ووصلنا لإيه؟”، دي علاقات بتستهلكك أكتر ما بتكملك، بتخليك دايمًا في حالة قلق بدل ما تكون في حالة راحة. العلاقة الصح بتكون زي الملجأ، زي البيت اللي تروحلُه من غير تردد، مش المكان اللي تحس فيه بالغربة حتى وأنت وسطه.

عشان كده، دايمًا اختار تكون في علاقة تخليك مطمئن، تخليك مرتاح، تخليك حاسس إنك بتدي لأنك عايز، مش لأنك مجبر. العلاقة الصح مش بالمساومة، مش بالحسابات، لكنها بطيب الأثر، بصدق المشاعر، وبالراحة اللي تحسها لما تعرف إنك في المكان الصح، ومع الشخص الصح.
-ندى بحر